Información: Diario Oficial de Galicia de 5 de marzo de 2008

O prazo de presentación de solicitudes será dun mes contado desde o día seguinte ao da publicación desta orde no DOG.

As actividades para as que se solicita a axuda terán que ser realizadas durante o curso académico 2007/2008.

Poderán solicitar estas axudas os/as alumnos/as universitarios/as que cumpran os seguintes requisitos:

a) Estar matriculado no curso 2007/2008, en calquera das universidades do Sistema Universitario de Galicia, ou nos centros asociados da UNED en Galicia, no derradeiro curso dunha titulación de primeiro ciclo; no segundo ciclo de titulacións de ciclo longo, na etapa de formación do terceiro ciclo, ou nun programa oficial de posgrao conducente ao título de máster.

b) Atoparse matriculado, nos plans de estudos estruturados por créditos, polo menos, en 50 créditos, ou nos que restan para adquirir a titulación.

c) Posuír unha nota media no seu expediente académico igual ou superior a 1 punto. No caso de alumnos de ensinanzas técnicas, a nota obtida polo alumno multiplicarase por un coeficiente corrector de 1,35 puntos.

d) Asistir a un congreso, seminario, simposio ou similar, organizado por universidades públicas, privadas ou outras institucións de recoñecido prestixio académico no que se traten aspectos relacionados coas materias obxecto dos estudos que están a realizar.

e) Que as actividades teñan unha duración mínima de 24 horas acreditadas pola entidade organizadora.

As solicitudes, segundo o modelo que se publica como anexo convocatoria, asinadas polo/a solicitante poderán presentarse:

a) No rexistro xeral da Consellería de Educación e Ordenación Universitaria, dirixidas á Dirección Xeral de Ordenación e Calidade do Sistema Universitario de Galicia, edificio administrativo San Caetano, s/n, 15781 Santiago de Compostela, ou ben en calquera dos centros previstos no artigo 38.4º da Lei 30/1992, do 26 de novembro.

b) Nos rexistros oficiais das universidades do sistema universitario de Galicia.

c) Nas oficinas de correos, en sobre aberto, para que sexa datada e selada polo/a funcionario/a de correos antes de que proceda á súa certificación postal.